अनिस तामाङ /युएई
नेपाल आदिवासी जनजाति महासंघ युएई लगायत महासंघ मातहतका ११ ओटा जातिय संघ संस्थाहरुको संयुक्त आयोजनामा युएईमा महामानव गौतम बुद्धको २५६३ औं जन्म जयन्ती कार्यक्रम भव्य रुपमा सम्पन्न भएको छ ।
नेपाल आदिबासी जनजाति महासंघ युएईका अध्यक्ष पासाङ शेर्पाको सभापतित्व, नेपाल आदिबासी जनजाति महासंघ युएईका प्रमुख संरक्षक तथा पूर्व अध्यक्ष डेर राज तमुको प्रमुख अतिथ्य तथा एनआरएन युएईका अध्यक्ष रमेश श्रेष्ठ, तामाङ समाज युएईका अध्यक्ष महेश मोक्तान, नेपाली समाज युएईका अध्यक्ष सिपि सापकोटा लगायत विभिन्न जातिय,जिल्लागत,राजनीतिक दलका प्रतिनिधिहरुको आतिथ्यमा कार्यक्रम सम्पन्न भएको हो ।
निर्धारित समय भन्दा केही समय ढिलो सुरु भएको उक्त कार्यक्रम लामा गुरुहरुद्धारा बौद्ध पूजापाठ तथा धार्मिक प्रवचनको साथमा दीप प्रज्वालन गरेर उद्घाटन गरेका थिए । कार्यक्रम संयोजक तथा नेपाल आदिबासी जनजाति महासंघ युएईका महासचिव सनिल घिसिङले कार्यक्रममा स्वागत मनतव्य राखेका थिए ।
उक्त कार्यक्रमको शुभकामना मनतव्य क्रममा नेपाल आदिबासी जनजाति महासंघ युएईका अध्यक्ष पासाङ शेर्पाले पछिल्लो चरण राज्यले विभिन्न बहानामा आदिबासी जनजातिहरुको प्राप्त भइसकेको अधिकारहरु समेत कटौती गर्दै गरेकोमा राज्यको गम्भीर ध्यानकर्षण गराएका छन । नेवार समुदायको अस्तित्वसंग जोडेको गुठी माथिको हस्तक्षेप, लोकसेवा विज्ञानपनमा संविधानको मर्म विपरीत समानुपातिक समाबेशिता नभएको प्रति पूर्व अध्यक्ष डेरराज तमुले आक्रोश व्यक्त गरे ।
त्यसैगरि नेपाल समाज युएईका अध्यक्ष सिपि सापकोटाले व्यबहारिक रुपमा बुद्धको अनुयायी जस्तो नभएमा बुद्धको जन्म जयन्ती मनाउनुको अर्थ नहुने, त्यसैले बुद्धको मार्गदर्शनमा हिड्न र युएईको कानुनलाई मध्यनजर गरेर पछिल्लो चरण देखेको विकृति बारे सचेत हुन उपस्थित सबैमा आह्वन समेत गरेका थिए भने तामाङ समाज युएईका अध्यक्ष महेश मोक्तानले बुद्ध दर्शन र त्यसको औचित्य बारे प्रष्ट्याएका थिए ।
अनौपचारिक कार्यक्रममामा आदिबासी जनजाति महासंघ मातहतका जातिय संघ संस्थाहरु तामाङ समाज युएई, तमु समाज युएई, शेर्पा किदुग युएई, नेपाल मगर समाज, किराँत राई यायोक्खा, किराँत याक्थुङ चुम्लुङ, प्रवासी माझी समाज, प्रवासी भुजेल सेवा समिति, सुनवार सेवा समाज, नेवा पुच:, थारु कल्याणकारी समाजका कलाकारहरुले आफ्नो जातिय पहिचान झल्किने विभिन्न प्रस्तुतिहरु समेत प्रदर्शन गरेका थिए । उक्त कार्यक्रमको औपचारिक तर्फ कुमार बलामी र विजय लक्ष्मी राई, अनौपचारिक तर्फ केशवराज महतो र सांगी डोल्मो गुरुङले सञ्चालन गरेका थिए ।
437पटक हेरिएको 
